Rreth 140 milionë euro është vlera e kostos fiskale të kursyer nga tatimpaguesit përmes procesit të rivlerësimit të pasurive të paluajtshme, gjatë periudhës mars-gusht 2026.

Sipas të dhënave të publikuara sot nga administrata tatimore, në vetëm gjashtë muaj, rivlerësimi i pasurive ka sjellë një lehtësi të konsiderueshme fiskale për qytetarët dhe bizneset.

Administrata Tatimore e cilëson këtë një lehtësi konkrete fiskale, e cila synon të ulë barrën për tatimpaguesit dhe të krijojë përfitim të drejtpërdrejtë për ta.

Procesi i rivlerësimit të pasurive të paluajtshme u mundëson tatimpaguesve të përditësojnë vlerën e pasurive të tyre, duke ndikuar në detyrimet fiskale që lidhen me to.

Administrata Tatimore vijon të promovojë shërbimet dhe lehtësitë fiskale për qytetarët dhe bizneset, në kuadër të një administrimi më të thjeshtë dhe më të orientuar drejt nevojave të tatimpaguesve.

Burimi ATSH