Bizneset e vogla dhe të mesme që synojnë të zgjerojnë aktivitetin e tyre kanë tashmë mundësi të përfitojnë nga skema e financimit “Dyfisho sipërmarrjen tënde”.

Zëvendëskryeministrja Albana Koçiu tha se programi synon të mbështesë investimet në sektorin fason dhe në prodhimin e mobiljeve, përmes financimit me interesa preferenciale.

Sipas Koçiut, financimi parashikon interesa në nivelin 2–3%, garanci sovrane deri në 70% dhe maturim deri në 24 muaj.

“Më shumë mundësi për bizneset e vogla dhe të mesme që duan të investojnë, të rriten dhe të krijojnë vende të reja pune. Përmes programit të qeverisë shqiptare “Dyfisho sipërmarrjen tënde”, mbështesim investimet në sektorin fason dhe në prodhimin e mobiljeve, përmes financimit me interes preferencial 2–3%, garanci sovrane deri në 70% dhe maturim deri në 24 muaj”, informoi Koçiu.

Sipas zv/kryeministres, kjo është një politikë konkrete për t’i dhënë më shumë hapësirë biznesit shqiptar, për të nxitur investimet, për të rritur prodhimin dhe për të forcuar ekonominë shqiptare.

“Dyfisho Sipërmarrjen Tënde” është prezantuar si një masë konkrete për të lehtësuar aksesin e bizneseve në financim, nxitur investimet dhe rritur kapacitetet prodhuese.

Mbështetja synon të krijojë më shumë hapësirë për sipërmarrjen shqiptare, të rrisë prodhimin dhe të kontribuojë në forcimin e ekonomisë dhe hapjen e vendeve të reja të punës.

Burimi ATSH