Ministri i Shtetit për Pushtetin Vendor, Ervin Demo, apeloi për kujdes maksimal nga qytetarët, pasi temperaturat e larta gjatë ditëve në vijim pritet të rrisin ndjeshëm rrezikun për shpërthimin dhe përhapjen e zjarreve në një pjesë të madhe të vendit.

Duke iu referuar paralajmërimit të Institutit të Gjeoshkencave, Energjisë, Ujit dhe Mjedisit (IGJEUM), Demo bëri të ditur se gjatë së martës dhe së mërkurës pritet nivel i lartë rreziku nga zjarret në shumicën e qarqeve.

Sipas njoftimit, qarqet Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër janë në nivel të lartë rreziku, ndërsa në qarqet Shkodër, Kukës dhe Dibër rreziku parashikohet kryesisht i moderuar, me zona ku mund të arrijë gjithashtu nivel të lartë.

Ministri u bëri thirrje qytetarëve të shmangin çdo veprim që mund të shkaktojë zjarr, duke mos ndezur zjarre në ambiente të hapura dhe duke mos hedhur bishta cigaresh në natyrë.

Ai kërkoi gjithashtu që çdo vatër zjarri të raportohet menjëherë pranë strukturave përgjegjëse, duke theksuar se parandalimi mbetet mënyra më efektive për mbrojtjen e jetës, pronës dhe pasurive natyrore.

“Mbrojtja e pyjeve dhe e mjedisit është përgjegjësi e përbashkët. Me kujdesin e secilit prej nesh, mund të parandalojmë zjarret dhe të mbrojmë natyrën”, u shpreh Demo.

Burimi ATSH