Ministri i Mbrojtjes, Ermal Nufi zhvilloi takim me sportistët elitarë, pjesë e Forcave të Armatosura, ku u diskutua mbi nismën për përfshirjen e tyre në organizimin e klasave sportive si program ekstrakurrikular në strukturat dhe Akademinë e Forcave të Armatosura.

Gjatë bashkëbisedimit ku ishte i pranishëm edhe shefi i Shtabit të Përgjithshëm të Forcave të Armatosura, gjenerallejtënant Arben Kingji, u theksua se, angazhimi i kampionëve dhe sportistëve elitarë në procesin e përgatitjes së kadetëve dhe personelit ushtarak do të sjellë përfitime të rëndësishme në rritjen e kapaciteteve fizike, psikologjike dhe profesionale të Forcave të Armatosura.

“Përvoja e sportistëve elitarë do të kontribuojë në përmirësimin e metodave të stërvitjes, forcimin e disiplinës, frymës së garës dhe përgatitjes për përballimin e sfidave operacionale, emergjencave civile dhe misioneve ndërkombëtare”, u shpreh gjatë takimit, ministri Nufi.

Duke vlerësuar kontributin që sportistët elitarë i kanë dhënë vendit, si në arenën sportive ashtu edhe si pjesëtarë të Forcave të Armatosura, ministri Nufi nënvizoi se modeli i tyre i suksesit, përkushtimit dhe profesionalizmit është një frymëzim për brezat e rinj.

Nisma parashikon krijimin e klasave sportive në Akademinë e Forcave të Armatosura (AFA) me synim zhvillimin fizik dhe psikologjik të kadetëve dhe ushtarakëve, rritjen e performancës sportive të personelit, promovimin e sportit në Forcat e Armatosura, krijimin e ekipeve përfaqësuese në aktivitete të ndryshme sportive, si edhe transferimin e përvojës së sportistëve elitarë te brezi i ri.

Sportistët do të mund të angazhohen në mënyrë vullnetare, si pedagogë të jashtëm, trajnerë, mentorë, lektorë motivues apo konsulentë teknikë, në bashkëpunim me AFA, Komitetin Olimpik Kombëtar Shqiptar dhe federatat sportive.

Programi parashikon përfshirjen e disiplinave të ndryshme sportive, si xhudo, mundje, boks, taekwondo, karate, kickboxing, biathlon dhe pentathlon ushtarak, qitje, atletikë, peshëngritje, gjimnastikë dhe sporte ekipore, duke shfrytëzuar infrastrukturën sportive të Akademisë së Forcave të Armatosura.

Burimi ATSH