Gjatë 6-mujorit të parë të vitit 2026 janë regjistruar 11 567 subjekte të reja në Qendrën Kombëtare të Biznesit (QKB), duke shënuar një rritje prej 7,5% krahasuar me të njëjtën periudhë të vitit 2025.

Sipas treguesve statistikorë të publikuar nga QKB, numri i regjistrimeve të reja është rritur me 806 subjekte në raport me një vit më parë, duke reflektuar një ecuri pozitive të aktivitetit ekonomik dhe administrativ në regjistrat që administron institucioni.

Pjesën më të madhe të regjistrimeve e zënë personat fizikë, me 8 757 subjekte ose 75,7% të totalit, ndërsa Shoqëritë me Përgjegjësi të Kufizuar (SHPK) vijojnë të jenë forma tjetër më e përdorur e organizimit të biznesit, me 2 775 regjistrime.

Një tregues i rëndësishëm është rritja e regjistrimeve të bizneseve me kapital 100% të huaj, të cilat arritën në 1 240 subjekte, me një rritje prej 35,7% krahasuar me periudhën janar–qershor 2025.

Në shpërndarjen gjeografike, Qarku Tiranë kryeson me 6 039 regjistrime, duke përfaqësuar 52,2% të totalit, i ndjekur nga Vlora me 1 347 dhe Durrësi me 1 310 regjistrime. Rritje të regjistrimeve janë evidentuar edhe në qarqet veriore, si Lezhë, Shkodër, Dibër dhe Kukës.

Sektori i tregtisë me shumicë dhe pakicë mbetet më i preferuari për bizneset e reja, me 2 771 subjekte, ndërsa pas tij renditen akomodimi dhe shërbimi ushqimor, aktivitetet profesionale, transporti dhe informacioni e komunikacioni.

Rritje të ndjeshme janë shënuar edhe në sektorin e pasurive të paluajtshme, me 35,8%, si dhe në transport dhe magazinim, me 26,3%.

Gjatë kësaj periudhe, në Regjistrin Kombëtar të Lejeve, Licencave dhe Autorizimeve u regjistruan 897 licenca dhe 124 leje, ndërsa në Regjistrin e Pronarëve Përfitues u regjistruan 2 813 subjekte, me një rritje prej 7,1% krahasuar me 6-mujorin e parë të vitit të kaluar.

Burimi ATSH