Komisioneri për Mbrojtjen nga Diskriminimi, Genta Tafa (Bungo), priti në takim ambasadorin e Prezencës së OSBE-së në vendin tonë, Michel Tarran.

Në takim u diskutuan mundësitë për forcimin e bashkëpunimit ndërinstitucional në mbështetje të misionit të Institucionit të Komisionerit për Mbrojtjen nga Diskriminimi, me fokus të veçantë në parandalimin dhe adresimin e gjuhës së urrejtjes, përmes marrjes së iniciativave të përbashkëta që synojnë promovimin e respektit, barazisë dhe mosdiskriminimit.

Një tjetër temë e rëndësishme e diskutimit ishte mbështetja e Prezencës së OSBE-së në Shqipëri për organizimin e ditëve ndërgjegjësuese në kuadër të nismës “Udhëtim në Shqipëri”, e cila synon të rrisë ndërgjegjësimin mbi të drejtën për trajtim të barabartë, të promovojë kulturën e mosdiskriminimit dhe të afrojë institucionin me qytetarët në mbarë vendin.

Komisioneri vlerësoi bashkëpunimin e deritanishëm me Prezencën e OSBE-së në Shqipëri dhe theksoi rëndësinë e partneriteteve institucionale në avancimin e të drejtave të njeriut dhe forcimin e mekanizmave për mbrojtjen nga diskriminimi.

Në fund të takimit, palët shprehën gatishmërinë për të vijuar bashkëpunimin në realizimin e nismave dhe aktiviteteve me interes të përbashkët, në funksion të ndërtimit të një shoqërie gjithëpërfshirëse, të bazuar në barazi, respekt dhe dinjitet për çdo individ.

Burimi ATSH