Miliona amerikanë po përballen me temperatura përvëluese, ndërsa një valë e fortë të nxehti ka përfshirë pjesën qendrore dhe lindore të Shteteve të Bashkuara të Amerikës.

Sipas Shërbimit Kombëtar të Motit, temperaturat në shumë zona pritet të kalojnë 38 gradë Celsius, ndërsa lagështia e lartë do ta bëjë nxehtësinë të ndihet deri në 46 gradë Celsius.

Meteorologët paralajmërojnë se temperaturat rekord priten të zgjasin deri pas festimeve të 4 korrikut, kur SHBA-ja shënon 250-vjetorin e pavarësisë.

Mbi 60 milionë banorë ndodhen aktualisht nën paralajmërime për temperatura ekstreme.

Autoritetet shëndetësore u kanë bërë thirrje qytetarëve të shmangin ekspozimin në diell, të konsumojnë sa më shumë lëngje dhe të njohin shenjat e goditjes nga të nxehtit, e cila mund të jetë kërcënuese për jetën.

Në Çikago janë hapur qendra të posaçme freskimi dhe po kryhen kontrolle për të moshuarit dhe grupet më të rrezikuara.

Ndërkohë, në Nju Jork autoritetet kanë vendosur pika të lëvizshme për shpërndarjen e ujit, stacione freskimi me ventilatorë dhe peshqirë të ftohtë.

Edhe Uashingtoni pritet të përjetojë temperatura rreth 38 gradë Celsius nga e enjtja deri të shtunën, pikërisht gjatë festimeve të Ditës së Pavarësisë.

Vala e të nxehtit po ndikon edhe në zhvillimin e ndeshjeve të Kupës së Botës, që po organizohet nga SHBA-ja, Kanadaja dhe Meksika.

Disa takime janë planifikuar në kushte të vështira klimatike, ndërsa tashmë janë raportuar vonesa për shkak të motit dhe dhjetëra tifozë kanë marrë ndihmë mjekësore për probleme të shkaktuara nga temperaturat e larta.

Burimi ATSH