Instituti i Statistikave të Shqipërisë (INSTAT) publikoi të dhënat për prodhimin bujqësor në vitin 2025, ku fermerët shqiptarë kanë prodhuar rreth 9,7 milionë tonë produkte bujqësore, me ndryshime të ndryshme sipas sektorëve kryesorë të ekonomisë rurale.

Sipas të dhënave zyrtare, perimet mbeten kategoria kryesore e prodhimit, me rreth 1,4 milionë tonë dhe një rritje prej 1,5% krahasuar me një vit më parë. Qarqet Fier, Tiranë dhe Berat përbëjnë rreth 62% të prodhimit total të perimeve në vend.

Prodhimi në serra zë 22,1% të totalit të perimeve, por ka shënuar rënie prej 0,9%. Qarku i Fierit mban peshën kryesore me 48,7%, ndërsa Berati kontribuon me 30,5%.

Drithërat kanë arritur në rreth 624 mijë tonë, por me rënie krahasuar me vitin 2024. Gruri ka shënuar ulje prej 10,1%, ndërsa elbi është rritur me 13,6%.

Në sektorin e pemëtarisë, prodhimi i frutave ka zbritur në 253 mijë tonë, me një rënie prej 12,8%, ku qarku i Korçës mbetet kontribuuesi kryesor.

Prodhimi i ullinjve ka arritur në 143 mijë tonë, me një ulje prej 2,3%, ndërsa agrumet janë regjistruar në 59 mijë tonë, me qarkun e Vlorës si prodhuesi kryesor.

Ndërkohë, bimët mjekësore kanë shënuar rritje prej 9,6%, ndërsa patatja ka pësuar rënie prej 7,2%.

Sipas INSTAT, struktura e prodhimit bujqësor vijon të mbetet e përqendruar në disa qarqe kryesore, ku Fieri, Berati, Korça dhe Vlora ruajnë peshën më të madhe të prodhimit kombëtar.

Burimi ATSH