Kryeministri Edi Rama mori pjesë sot në prezantimin e pesë projekteve finaliste të Konkursit Ndërkombëtar për Kampusin e Ri Universitar “Aleksandër Moisiu” në Durrës, një projekt që synon transformimin e arsimit të lartë dhe krijimin e një qendre moderne akademike me standarde bashkëkohore.

Gjatë aktivitetit, Rama theksoi se kampusi i ri universitar është konceptuar si një hapësirë ku arsimi, kërkimi shkencor, inovacioni, sipërmarrja, kultura dhe jeta studentore do të ndërthuren në një ekosistem të vetëm zhvillimi, duke e kthyer universitetin në një motor të rëndësishëm të zhvillimit ekonomik dhe social.

Në fjalën e tij, Rama u shpreh se ky kampus nuk përjashton zhvillimin e kampusit universitar në Tiranë.

“Ky kampus nuk është një zhvillim që përjashton zhvillimin e Kampusit të Tiranës. Ne jemi edhe në një proces harmonizimi të nevojave dhe adresimit të tyre mes Kolegjit të Europës dhe Universitetit të Tiranës. Kolegji i Europës po ndërtohet në Tiranë dhe është një zhvillim tjetër spektakolar, i bazuar në një tjetër projekt të arkitektëve tanë ndërkombëtarë. Aty do të krijohet mundësia që të ketë hapësira të konsiderueshme edhe për Universitetin e Tiranës”, deklaroi Rama.

Sipas Kryeministrit, projekti i Kampusit të ri Universitar “Aleksandër Moisiu” synon të krijojë kushte moderne për studentët dhe stafin akademik, duke integruar mjedise mësimore, laboratorë kërkimorë, hapësira inovacioni, ambiente kulturore dhe shërbime për jetën studentore.

Pesë ekipet finaliste paraqitën vizionet dhe propozimet e tyre arkitektonike për kampusin, i cili pritet të shndërrohet në një nga projektet më të rëndësishme universitare dhe urbane në vend.

Burimi ATSH