Kryeministri Edi Rama reagoi sot lidhur me debatet për projektin turistik në Zvërnec, duke ironizuar kundërshtarët e investimit dhe duke i ftuar të tregojnë më shumë kujdes ndaj mjedisit gjatë vizitave të tyre në zonë.

Rama u bëri thirrje atyre që shkojnë në Zvërnec për të mbrojtur flamingot, të mos futen me automjete në plazh, pasi sipas tij kjo shqetëson habitatin natyror të shpendëve.

Kryeministri kritikoi gjithashtu ndotjen e zonës nga vizitorët, duke pretenduar se pas protestës së zhvilluar një ditë më parë në terren kishin mbetur kanoçe birre dhe mbetje të tjera.

Sipas Ramës, flamingot u rikthyen në lagunat e zonës pas vendosjes së moratoriumit 10-vjeçar të gjuetisë, ndërsa kundërshtimet ndaj investimit në Zvërnec nuk lidhen me mbrojtjen reale të mjedisit.

“Një lutje të përulur revolucionarëve, që kur të shkojnë herë tjetër në atë breg për t’u qarë hallin flamingove, të mos i bëjnë për të qarë duke ua zhvirgjëruar plazhin me makinat e tyre, se do kujtojnë të shkretët zogj se filloi ndërtimi i parkimit aty, e do marrin arratinë siç e kishin marrë përpara moratoriumit 10-vjeçar të gjuetisë. Po t’i lënë rrotat tek rruga automobilistike e të ecin si flamingo deri tek buza e detit pa u trembur nga papastërtitë, por mundësisht pa i shtuar ato si dje që i kishin lënë mbrapa kanoçet e birrës”, u shpreh Rama.

Burimi ATSH