Ministri i Mjedisit, Sofjan Jaupaj prezantoi në Kuvend projektligjin “Për disa ndryshime dhe shtesa në ligjin ‘Për burimet ujore’, të ndryshuar”, i cili parashikon kalimin e Agjencisë së Menaxhimit të Burimeve Ujore (AMBU) nga varësia e kryeministrit në varësi të Ministrisë së Mjedisit.

Gjatë fjalës së tij, ministri tha se ndryshimet janë hartuar në vijim të rekomandimeve të raportit të SIGMA-s të vitit 2025 për “Forcimin e qendrës së qeverisjes në Shqipëri”. Së dyti, menaxhimi i burimeve ujore është një politikë sektoriale që lidhet drejtpërdrejtë me mjedisin.

Sipas tij, rekomandimi për kalimin e AMBU-së në varësi të Ministrisë së Mjedisit lidhet me nevojën për koordinim më të mirë institucional dhe me përafrimin ndaj standardeve europiane për menaxhimin e ujërave.

“Ky konfigurim është në përputhje me acquis të BE-së për menaxhimin e ujërave, i cili e trajton ujin si element ekologjik dhe mjedisor”, deklaroi ministri.

Ai shtoi se ndryshimet synojnë gjithashtu forcimin e koordinimit në kuadër të procesit të integrimit europian, pasi nënkapitulli i ujit është pjesë e Kapitullit 27, që drejtohet nga Ministria e Mjedisit.

Projektligji parashikon ndryshime në kompetencat institucionale, procedurat e administrimit të burimeve ujore dhe rolin e Ministrisë së Mjedisit në hartimin dhe zbatimin e politikave për menaxhimin e ujërave.

Burimi ATSH