Shqipëria renditet ndër vendet me normat më të larta të burgosjes në Evropë, sipas statistikave vjetore të Këshillit të Evropës për popullsinë në burgje (SPACE I) për vitin 2025, të publikuara sot. Sipas të dhënave, në Shqipëri ka 192 të burgosur për çdo 100 mijë banorë.

Në aspektin e dendësisë në burgje, raporti evidenton se Shqipëria regjistroi 79 të burgosur për çdo 100 vende të disponueshme, duke u renditur ndër administratat penitenciare me ngarkesë më të ulët në raport me kapacitetin.

Sa i përket grave të burgosura, Shqipëria kishte një nga përqindjet më të ulëta në Evropë, me vetëm 1,6% të popullsisë së burgjeve që përbëhej nga gra.

Sipas raportit, përqindja e shtetasve të huaj në burgjet shqiptare ishte 3,4%, duke e vendosur Shqipërinë ndër vendet me praninë më të ulët të të huajve në sistemin penitenciar.

Një nga treguesit më të lartë për Shqipërinë ishte ai i paraburgimit. Sipas raportit, 62% e të burgosurve në vend ishin në paraburgim, përqindja më e lartë mes vendeve të Këshillit të Evropës.

Raporti nënvizon se Shqipëria renditet e shtata në Evropë për shkallën e burgosjes dhe e para për përqindjen e personave në paraburgim.

Gjithashtu, Shqipëria përmendet si vendi me përqindjen më të ulët të grave në burg, krahasuar me shtetet e tjera të përfshira në raport.

Marrë nga ATSH