Ministri i Mjedisit, Sofjan Jaupaj zhvilloi sot një takim me Dame Dimitrovskin, këshilltar i kryeministrit të Maqedonisë së Veriut, si dhe Raimund Jehle, përfaqësues i FAO-s, në kuadër të konferencës rajonale “United for Climate” (Të bashkuar për klimën).

Jaupaj nënvizoi se gjatë takimeve me ta, u diskutua avancimi i një iniciative rajonale për sektorin pyjor, e mbështetur nga Green Climate Fund dhe FAO.

Sipas tij, iniciativa synon restaurimin e pyjeve, monitorimin modern të territorit, menaxhimin e riskut nga zjarret, si dhe forcimin e kapaciteteve të vendeve të rajonit për t’u përballur me efektet e ndryshimeve klimatike.

Projekti parashikon një investim prej 50 milionë dollarësh për sektorin pyjor në rajon, duke synuar rritjen e qëndrueshmërisë mjedisore dhe mbrojtjen afatgjatë të ekosistemeve pyjore në Ballkanin Perëndimor.

Gjatë takimit, pjesëmarrësit vlerësuan se bashkëpunimi rajonal mbetet një element kyç për ndërtimin e një Ballkani Perëndimor më të qëndrueshëm, më të sigurt dhe më pranë standardeve europiane në fushën e klimës dhe mjedisit.

Burimi ATSH