Ministrja e Ekonomisë dhe Inovacionit, Delina Ibrahimaj, zhvilloi sot një vizitë në sipërmarrjen FinTech në Tirana, ku u njoh nga afër me produktet digjitale dhe projektet inovative që po zhvillohen nga të rinjtë shqiptarë në fushën e teknologjisë.

Gjatë vizitës, ministrja Ibrahimaj vlerësoi rolin në rritje të startup-eve në ndërtimin e një ekonomie moderne dhe konkurruese, duke theksuar se inovacioni dhe digjitalizimi janë shtylla kyçe për zhvillimin e qëndrueshëm të vendit.

“Mbështetja e të rinjve që po ndërtojnë zgjidhje inovative është thelbësore për të ardhmen e ekonomisë sonë. Idetë dhe produktet që po zhvillohen sot në sektorin e teknologjisë janë një potencial real për përmirësimin e shërbimeve publike dhe rritjen e cilësisë së jetës për qytetarët”, u shpreh Ibrahimaj.

Në fokus të diskutimeve ishte kontributi i sipërmarrjeve FinTech në transformimin e shërbimeve publike, përmes zgjidhjeve inteligjente që synojnë rritjen e efikasitetit, transparencës dhe aksesit për qytetarët.

Përfaqësuesit e kompanisë prezantuan disa nga projektet e tyre më të fundit, duke theksuar sfidat dhe mundësitë që ofron tregu shqiptar për zhvillimin e teknologjive financiare dhe shërbimeve digjitale.

Ministrja Ibrahimaj nënvizoi angazhimin e qeverisë për të krijuar një mjedis sa më të favorshëm për inovacionin dhe sipërmarrjen, përmes politikave mbështetëse dhe nxitjes së bashkëpunimit mes institucioneve publike dhe sektorit privat.

Burimi ATSH