Komisioni për Bujqësinë, Ushqimin dhe Zhvillimin Rural shqyrtoi projektligjin “Për ratifikimin e marrëveshjes ndryshuese nr. 2, me shkëmbim të letrash, të marrëveshjes së financimit ndërmjet Republikës së Shqipërisë, Malit të Zi dhe Komisionit Evropian, për programin IPA të bashkëpunimit ndërkufitar Mali i Zi–Shqipëri 2021–2027”.

Gjatë raportimit në komision, drejtoresha e Agjencisë Shtetërore të Programimit Strategjik dhe Koordinimit të Ndihmës (SASPAC), Eridana Çano, u shpreh se ndryshimet e parashikuara në marrëveshje synojnë vijimësinë pa pengesa të programit, rritjen e fleksibilitetit të fondeve si dhe forcimin e bashkëpunimit ndërkufitar mes dy vendeve.

Relatori i projektligjit, deputeti Tërmet Peçi, theksoi se marrëveshja e ndryshuar krijon lehtësi në menaxhimin e fondeve, duke rritur transparencën dhe efikasitetin e përdorimit të tyre.

Sipas tij, kjo marrëveshje mbështet investimet në zonat ndërkufitare, veçanërisht në sektorët e mjedisit dhe turizmit të qëndrueshëm. Financimi i programit parashikon mbështetje në masën 80% nga fondet e Bashkimit Evropian dhe 15% nga bashkëfinancimi kombëtar.

“Për periudhën 2024–2029, parashikohet që Shqipëria të përfitojë rreth 6 milionë euro nga ky program, ndërsa fondet buxhetore do të kontribuojnë në zbatimin e projekteve përkatëse”, tha ai.

Zbatimi i projekteve dhe monitorimi i financimeve do të kryhet nga SASPAC, në bashkëpunim me Ministrinë e Financave.

Peçi vlerësoi projektligjin në përputhje me kuadrin ligjor në fuqi dhe me rëndësi për zhvillimin e vendeve ndërkufitare Shqipëri- Mal i Zi.

Burimi ATSH