Javët Kulturore Ndërkombëtare 2026 nisin këtë muaj në edicionin e tyre të 5-të, duke rikthyer në Shqipëri tingujt, imazhet, aromat dhe shijet e vendeve të ndryshme të botës.

Kryeministri Edi Rama u shpreh sot se Shqipëria do të shndërrohet në skenën e madhe ku artistë nga e gjithë bota bashkohen për të sjellë emocione, ngjyra dhe histori që flasin përtej kufijve.

“Rikthehet energjia që na bashkon”, u shpreh Rama.

“Javët Kulturore Ndërkombëtare” janë nismë e Ministrisë së Ekonomisë, Kulturës dhe Inovacionit që sjellin një seri veprimtarish, të cilat kanë si qëllim njohjen dhe përqafimin nga publiku të kulturave të ndryshme botërore.

Çdo javë i kushtohet një kulture të caktuar botërore që afrohet në sofrën mikpritëse shqiptare nëpërmjet aktiviteteve duke përfshirë filma, melodi, arkitekturë, kostume, kulinari dhe trashëgimi.

Nëpërmjet kësaj nisme vendet njihen më mirë, forcohen marrëdhëniet me partnerët ndërkombëtarë, si dhe rritet oferta e aktiviteteve kulturore në Shqipëri për të gjitha shijet dhe moshat.

JKN e shndërron skenën e aktiviteteve kulturore në vend në një arenë ndërkombëtare shumëkulturore dhe shumëdisiplinore, duke u konceptuar si një paradë kulturore që shtrihet prej majit e deri në dhjetor.

Burimi ATSH