Në Përmet u prezantua projekti “Green Vjosa”, një nismë e rëndësishme për mbrojtjen dhe zhvillimin e qëndrueshëm të lumit Vjosa, i cilësuar si lumi i fundit i egër në Evropë.

Ministri i Mjedisit Sofjan Jaupaj dhe Ministri Federal i Gjermanisë për Mjedisin, Carsten Schneider, prezantuan projektin që synon forcimin e mbrojtjes së biodiversitetit dhe zhvillimin e qëndrueshëm të zonave përgjatë lumit Vjosa.

Gjatë aktivitetit, delegacioni vizitoi Parkun Kombëtar të Lumit Vjosa, një prej ekosistemeve më të rëndësishme natyrore në Shqipëri, i njohur për vlerat e larta të biodiversitetit dhe rolin e tij në ruajtjen e ekuilibrave mjedisorë në rajon.

Projekti “Green Vjosa” 2026-2029, vlerësohet si një hap i rëndësishëm në konsolidimin e statusit të mbrojtur të lumit dhe në promovimin e zhvillimit të qëndrueshëm ekonomik dhe mjedisor për komunitetet lokale përgjatë tij.

Ministri Jaupaj theksoi rëndësinë e bashkëpunimit me partnerët ndërkombëtarë, duke shprehur mirënjohje të veçantë për Gjermaninë për mbështetjen e vazhdueshme në fushën e mbrojtjes së mjedisit dhe biodiversitetit në Shqipëri.

Projekti pritet të kontribuojë në: forcimin e kapaciteteve për menaxhimin e zonave të mbrojtura përmes trajnimeve, shkëmbimit të përvojave; nxitjes së bizneseve lokale dhe shërbimeve të bazuara në natyrë për krijimin e të ardhurave dhe vendeve të punës për komunitetin lokal si dhe në promovimin e Vjosës si një destinacion i rëndësishëm i turizmit të qëndrueshëm.

Parku Kombëtar i Vjosës është parku më i ri kombëtar i Shqipërisë dhe pjesë e aplikimit për t’u shpallur Rezervë e Biosferës nga UNESCO.

Burimi ATSH