Transaksionet në monedhën europiane kanë shënuar rritje gjatë muajit mars në Shqipëri, si në numër ashtu edhe në vlerë.

Sipas të dhënave të Bankës së Shqipërisë, gjatë marsit janë realizuar mbi 39 mijë transaksione në euro, me një vlerë totale prej 593 milionë euro. Krahasuar me muajt e mëparshëm të vitit, vihet re një rritje progresive, pasi në shkurt transaksionet arritën në 494,3 milionë euro, ndërsa në janar në 480,9 milionë euro.

Në total, për tre muajt e parë të vitit 2026, vlera e transaksioneve në euro ka arritur në rreth 1,5 miliardë euro.

Rritja e përdorimit të euros për pagesa dhe transferta tregon një orientim më të madh të bizneseve dhe qytetarëve drejt sistemit bankar, duke reduktuar përdorimin e parasë cash dhe duke ndikuar në formalizimin e ekonomisë.

Të dhënat e BSH-së tregojnë se gjatë vitit 2025, përmes sistemit AIPS–EURO janë transferuar mbi 6,3 miliardë euro, duke konfirmuar trendin në rritje të përdorimit të monedhës europiane në ekonominë shqiptare.

Burimi ATSH