Në kuadër të Forumit Ekonomik të Delfit në Athinë, Greqi u zhvillua ceremonia e nënshkrimit të Memorandumit të Mirëkuptimit ndërmjet Korporatës Shqiptare të Investimeve (AIC) dhe Hellenic Corporation of Assets and Participations S.A..

Ministrja e Ekonomisë dhe Inovacionit, Delina Ibrahimaj në një postim në rrjetet sociale tha se “ky memorandum shënon një hap konkret drejt forcimit të bashkëpunimit ekonomik mes Shqipërisë dhe Greqisë, duke krijuar ura të reja për zhvillimin e projekteve strategjike, menaxhimin më efikas të aseteve publike dhe nxitjen e investimeve të qëndrueshme”.

“Përmes këtij partneriteti, AIC synon të përfitojë nga eksperienca dhe praktikat më të mira ndërkombëtare, duke rritur kapacitetet institucionale dhe duke sjellë më shumë vlerë për ekonominë shqiptare”, tha Ibrahimaj.

Forumi Ekonomik i Delfit, një platformë ndërkombëtare e nivelit të lartë, çdo vit bën bashkë liderë politikë, përfaqësues të biznesit, akademikë dhe ekspertë nga e gjithë bota për të diskutuar sfidat kryesore globale, për të nxitur dialogun ndërkombëtar, për të shkëmbyer ide dhe për të kontribuar në hartimin e politikave që promovojnë zhvillimin e qëndrueshëm dhe bashkëpunimin rajonal e global.

Burimi ATSH