Në çdo të shtunë të fundit të marsit shënohet Ora e Tokës, një prej nismave më të mëdha mjedisore në botë.

Kjo nismë fton miliona njerëz të bashkohen në orën 20:30 duke fikur dritat dhe çdo pajisje elektrike jo të domosdoshme për 60 minuta, në shenjë sensibilizimi ndaj ndryshimeve klimatike dhe mbrojtjes së mjedisit.

Nismës i bashkohet edhe ministri i Mjedisit, Sofjan Jaupaj i cili fton qytetarët të fikin dritat për 60 minuta në shenjë solidarizimi.

“Sot bashkohemi për Orën e Tokës, si pjesë e angazhimit global, duke fikur dritat nga ora 20:30 deri në 21:30. Një gjest i thjeshtë me një mesazh të fuqishëm për mbrojtjen e planetit tonë dhe për një të ardhme më të qëndrueshme, sepse kujdesi për mjedisin nis nga veprimet tona të përditshme”, thekson Jaupaj në një postim në rrjetet sociale.

Lëvizja globale nxit vendet të fikin dritat për një orë për të tërhequr vëmendjen ndaj ndryshimeve klimatike. Kjo nismë filloi në vitin 2007 në Australi.

Burimi ATSH