Kompania “Amel” në Elbasan, një sipërmarrje dhe qendër kërkimore e njohur, ka sjellë një qasje të re në trajtimin e bimëve aromatike medicinale dhe mbetjeve organike.

Ministri i Mjedisit, Sofjan Jaupaj tha se me këtë qasje, hiqet dorë nga teknologjitë tradicionale të ekstraktimit.

“AMEL po aplikon në Shqipëri një zgjidhje moderne dhe të qëndrueshme që quhet “Supercritical fluid extraction”, një teknologji e gjelbër, pa mbetje, e cila garanton produkte të pastra dhe cilësore për tregjet globale”, tha Jaupaj.

Ministri Jaupaj, theksoi se në këtë kompani, përpunohen mbi 80 lloje bimësh me përdorim inovativ të mbetjeve organike nga bujqësia dhe akuakultura.

“Ky model dëshmon se ajo që dikur konsiderohej “mbetje”, sot mund të kthehet në vlerë të shtuar për ekonominë”, tha Jaupaj.

Ndërkohë, Lindita Vrushti, një prej bashkëthemelueseve të kompanisë, shprehet se ky është një biznes familjar që ka nisur në 2008 .

“Nuk deshëm që bimët medicinale të ekstraktoheshin me teknologjinë aktuale siç ishte distilimi apo me tretësa të tjerë kimik, por zgjodhëm një teknologji inovative, të gjelbër, pa mbetje. Këtë teknologji e morëm dhe implementuam në gjithë bimët medicinale. Kuptuam që tregjet kërkojnë bimë të pastra nga natyra, industria farmaceutike, ajo ushqimore, kozmetika natyrale, por edhe industri të tjera që prodhojnë ushqim për kafshët, por edhe biostimulues të tokës”, tha ajo.

Burimi ATSH