Kryeministri Edi Rama, njëherësh kryetar i Partisë Socialiste, gjatë fjalës së tij në Asamblenë Kombëtare të PS-së, tha se negociatat për anëtarësimin e Shqipërisë në Bashkimi Evropian nuk janë ndalur në asnjë moment dhe se procesi po ecën me ritme pozitive.

Rama theksoi se raporti i Komisioni Evropian për Shqipërinë është “i shkëlqyer”, ndërsa shtoi se negociatat me BE-në do të mbyllen brenda këtij mandate.

“Ka nevojë të komunikohet, t’u thuhet njerëzve e vërteta e thjeshtë fare, që negociata për anëtarësimin në BE nuk kanë ndalur për asnjë sekondë. T’u thuhet ndjerëve që raporti i Komisionin Evropian për vendet anëtare është i shkëlqyer për Shqipërinë, t’u thuhet njerëzve që vërteta e thjesht se ne negociatat me BE-në do t’i mbyllim brenda mandatit tonë dhe nuk ka mërgatë qyqesh në Berlin që na ndal ne në këtë proces nuk ka mërgatë qyqesh në Bruksel që e ndal Shqipërinë në këtë proces.

“Nuk ka më asnjë shans që ata që i grabitën Shqipërisë kohën, të vazhdojnë t’ja grabisin, ndërkohë që janë qindra e qindra njerëz të mobilizuar në administratën publike që punojnë në çdo kapitull të negociatave dhe që marrin gjithmonë vlerësime pozitive”, tha Rama.

Sa i përket kritikave të opozitës, Rama tha se më parë e kishin cilësuar procesin e integrimit si “imagjinar”, ndërsa tani, sipas tij, pretendojnë se Shqipëria po pengohet në momentin kur ishte pranë anëtarësimit.

“E ngritëm çështjen e anëtarësimit në Bashkimin Evropian, në një çështje mes nesh dhe atyre që kishim nga mbrapa. Them nga mbrapa, sepse ne përballë nuk kemi kënd, ne përballë kemi vetëm të ardhmen dhe vetveten, por me ato që kishim nga mbrapa dhe që pretendonin se do të na kapnin këmbën dhe do të na rrëzonin, ne vendosëm këtë vijë. Tani është shumë e bukur sesi është kthyer përmbys historia. Deri dje ata dilnin kudo dhe thonin se kjo është diçka imagjinare, është lojë e Edi Ramës për t’u treguar pasaportën evropiane dhe për t’ju shkëputur nga problemet reale dhe papritur para disa javësh u turrën të gjithë nëpër ekrane. u hodhën nëpër tenxhere, duke thënë se sapo ishim tek dera na e prishën. Sapo hymë, na e hodhën në erë”, tha Rama.

Marrë nga ATSH