Ministri i Mjedisit, Sofjan Jaupaj ka mbledhur një ditë më parë Këshillin Kombëtar të Faunës u vendos në fokus zbatimi i ligjit për Gjuetinë, duke diskutuar hapat konkretë për ta bërë atë efektiv dhe të zbatueshëm në terren.

Jaupaj së bashku me përfaqësues të shoqatave të mjedisit dhe të gjuetarëve dhe ekspertë të Ministrisë së Mjedisit, diskutuan për hartimin e akteve nënligjore, Programin Kombëtar të Zhvillimit të Gjuetisë, menaxhimin e zonave të gjuetisë, si edhe përcaktimin e një sistemi transparent dhe të drejtë tarifash.

Ministri theksoi se “bashkitë dhe federatat e gjuetarëve do të kenë një rol të rëndësishëm si aktorë kyç në menaxhimin e qëndrueshëm të faunës së egër, në bashkëpunim me ekspertizën shkencore për përgatitjen e listës së llojeve objekt gjuetie”.

Moratoriumi për gjuetinë, pas më shumë se një dekade, është hequr, duke lejuar këtë aktivitet në zona të caktuara, sipas rregullave të parashikuara në ligjin e ri të “Për gjuetinë”.

Tashmë ligji mbron të drejtën e gjuetarëve dhe nxit bashkëpunimin midis tyre dhe menaxhuesit të zonës, si dhe mes strukturave të parashikuara në këtë ligj për ruajtjen dhe menaxhimin e faunës së egër dhe të habitatit të saj.

Zonat e lejuara për gjueti shtrihen në sipërfaqe jo më të vogla se 500 ha në zonat fushore dhe jo më të vogla se 1000 ha në zonat malore, ndërsa rezervatet e mbarështimit të llojeve të faunës së egër, objekt gjuetie, krijohen në sipërfaqe jo më të vogla se 50 ha dhe kufijtë i propozohen ministrisë nga njësitë përgjegjëse për gjuetinë.