Kryeministri Edi Rama deklaroi sot se qeveria nuk synon të krijojë monopol në tregun e hidrokarbureve, por faktori shtetëror synon vetëm të ekuilibrojë tregun në funksion të konsumatorëve.

Në një takim me furnizuesit e naftës në vend, Rama tha se me këtë nismë synohet të mbështetet sovraniteti i vendit dhe të mbrohen konsumatorët nga çdo abuzim.

“Nuk do të detyrojmë askënd që të blejë nga ky faktor shtetëror. Nuk është që t’ju godasë ju, nuk është që të krijojë një monopol dhe të zotërojë tregun vetë. Faktori shtetëror nuk do të jetë një faktor që do të bëjë shpërndarje pakicë, do të jetë një faktor që do të mbështesë sovranitetin e vendit në të përditshmen e vet, kur vjen puna tek ky mall kaq jetik për ekonominë, edhe për jetën e përditshme. Sigurisht do të mbrojë konsumatorët nga çdo abuzim”, shtoi Rama.

Rama shprehu bindjen se ky do të jetë një faktor i mirëseardhur nga të gjithë ata që duan të kenë garanci afatgjatë, duan të kenë çmim të arsyeshëm.

“Ju jeni në tregun ndërkombëtar, por tjetër është kur kapaciteti financiar për të lidhur kontrata është i kufizuar, tjetër është kur mbrapa një marrëdhënie është një garanci sovrane. Këtë mund të bëjë faktori shtetëror, të garantojë kontrata në një afat shumë më të gjatë dhe të bëjë blerje në një afat shumë më të gjatë”, tha Rama.

Duke pasur kapacitetin të ketë fleksibilitet, kryeministri theksoi se do të krijohet në treg një ekuilibër i ri dhe i domosdoshëm.

Po ashtu, Rama hodhi poshtë edhe pretendimet se në Shqipëri ka oligarkë duke shtuar se nëse kjo do të ishte e vërtetë nuk do të paguanin më shumë ata që fitojnë më shumë.

“Po të kishte oligark në Shqipëri, nuk do kishte gjithë këto iniciativa nga ana jonë në gjithë këto vite për të ngushtuar rrethin e fitimit abuziv të atyre që kanë më shumë dhe po të kishte oligark në Shqipëri, nuk do të kishte sot, nuk e di se sa herë më tepër subjekte, të cilat kanë akses në fonde publike, falë konkurrencës”, shtoi Rama.

Burimi ATSH