Kryeministri Edi Rama tha sot se po punohet për Kodin e ri Penal dhe se për hartimin e tij po bashkëpunohet me ministritë e Drejtësisë të Francës dhe Italisë.

Gjatë një konference për shtyp nga Kryeministria, Rama, duke iu përgjigjur interesit të gazetarëve, u shpreh se për Kodin e ri Penal dhe Kodin e procedurës penale po punohet intensivisht.

“Ne do të bëjmë ndryshime të tjera. Kemi kodin e ri Penal, kemi ndërhyrjet e domosdoshme në kodin e procedurës penale, por të gjitha këto nuk kanë ngut. Për të gjitha këto po punojmë, kemi një material shumë voluminoz dhe me shumë brum për t’u diskutuar që është drafti i përgatitur nga grupi i ekspertëve të pavarur shqiptarë me në krye drejtorin e shkollës së magjistraturës. Është ripunuar, është në ripunim, sipas informacioneve që kam unë, mbi bazën e të gjitha vërejtjeve që janë bërë.

“Kemi dhe dy aleatë në këtë proces, ministrin e drejtësisë së Italisë dhe të Francës me një rrjet ekspertë që këto dy ministri na kanë vënë në dispozicion dhe me të cilët do të rishikojmë gjithë kodin e ri. Do rishikojmë normat e kodit të procedurës penale. Për kodin e ri, kemi dhe qeverinë holandezë të përfshirë që ka na ka vendosur në dispozicion dy ekspertë. Çdo gjë pra, është nën kontroll në kuptimin e mirë të fjalës dhe në respekt të të gjitha standardeve evropiane ndërkombëtare”, përfundoi Rama.

Burimi ATSH