Gjirokastra është kthyer tashmë në një destinacion të kërkuar në tregun turistik ndërkombëtar, ndërsa po vizitohet nga një numër në rritje vizitorësh nga gjithë bota.

Kryeministri Edi Rama ndau sot pamje nga qyteti i gurtë, ku vizitorët nga e gjithë bota kanë nisur ta gjallërojnë më herët se çdo vit.

Rama u shpreh optimist për një tjetër rekord për turizmin dhe gjithë zinxhirin e ekonomisë lokale në qytetin e gurtë, kjo falë edhe mikpritjes së ngrohtë.

Vlerat arkitektonike të qytetit duke nisur nga kalaja e gurtë, pazari karakteristik, muzetë, godinat dhe banesat tradicionale tërheqin një numër të lartë turistësh çdo vit.

Muzeu i Luftës së Ftohtë, Muzeu i Armëve, Etnografik dhe Muzeu Kadare shërbejnë si qendra për tërheqjen e vizitorëve por edhe për njohjen e turistëve me vlerat e historisë, traditës, figurat e shquara gjirokastrite në vite.

Ndërsa një fluks në rritje vizitorësh po vërehet po ashtu edhe në fshatrat përreth dhe zonat rurale, ku janë çelur njësi të reja të akomodimit për turistët me kushte dhe standarde bashkëkohore.

Ato ndërthurin arkitekturën karakteristike me vlerat e traditës dhe mikpritjen e banorëve duke shërbyer si mjedise tërheqëse për turistët vendas dhe të huaj.

/Marrë nga ATSH