Kryetari i Kuvendit, Niko Peleshi, priti në takim zyrtar kryetaren e Akademisë së Shkencave dhe Arteve të Kosovës, Justina Pula, kryetarin e Akademisë së Shkencave të Shqipërisë, Skënder Gjinushi, si dhe akademikët Bardh Rugova, Frashër Demaj, Vasil Tole dhe Anastas Angjeli.

Gjatë takimit u diskutua mbi bashkëpunimin ndërinstitucional dhe rolin e akademive në zhvillimin shkencor, kulturor dhe kombëtar të dy vendeve. Kryetari i Kuvendit vlerësoi kontributin e akademikëve në avancimin e kërkimit shkencor dhe në forcimin e identitetit kombëtar, duke theksuar rëndësinë e thellimit të bashkëpunimit mes institucioneve akademike të Shqipërisë dhe Kosovës.

Peleshi shprehu mbështetjen për Kryesinë e re të Akademisë së Shkencave dhe Arteve të Kosovës, duke uruar suksese në përmbushjen e misionit të saj në shërbim të dijes, kulturës dhe zhvillimit shoqëror.

Ai nënvizoi se Kuvendi i Shqipërisë nxit dhe mbështet rritjen e ndërveprimit mes Akademive të Shkencave, forcimin e rolit të kërkimit shkencor si një faktor thelbësor i zhvillimit të qëndrueshëm, si edhe shtimin e kontributit akademik në ruajtjen dhe konsolidimin e vlerave dhe identitetit kombëtar.

Të pranishmit vlerësuan klimën pozitive të bashkëpunimit mes dy vendeve dhe shprehën gatishmërinë për të intensifikuar projektet e përbashkëta në fushën e studimeve shkencore, arsimit dhe kulturës.

Burimi ATSH