Presidenti i Republikës, Bajram Begaj priti sot në një takim Kryeministrin Edi Rama.

Gjatë takimit që u zhvillua në Pallatin e Brigadave, Kryeministri Rama i paraqiti Kreut të Shtetit propozimet për ndryshimet në Kabinetin qeveritar.

Sipas presidencës, procedura kushtetuese parashikon 7 ditë afat për dekretimin e ministrave nga ana e Presidentit.

Pas dekretimit nga Presidenti, ndryshimet në kabinetin qeveritar do t’i kalojnë për miratim Kuvendit të Shqipërisë, ku pritet të votohen nga deputetët në seancë plenare.

Më 26 shkurt, në një mbledhjen e zgjeruar të grupit parlamentar të Partisë Socialiste, kryeministri Edi Rama propozoi ndryshime në kabinetin qeveritar.

Konkretisht në postin e zv.kryeministres u emërua Albana Koçiu, e cila zëvendëson në këtë pozicion Belinda Ballukun.

Ferit Hoxha, ish-ambasadori i Shqipërisë në BE, u emërua Ministër për Europën dhe Punët e Jashtme, duke zëvendësuar në këtë detyrë, Elisa Spiropalin.

Besfort Lamallari u largua nga posti i ministrit të Drejtësisë dhe u emërua Ministër i Brendshëm.

Toni Gogu u emërua në krye të Ministrisë së Drejtësisë ndërsa Erjona Ismaili u emërua ministre e Shtetit për Marrëdhëniet me Parlamentin.

Ndërkohë që Enea Karakaçi u emërua ministër i Infrastrukturës dhe Energjisë, post i mbajtur deri më tani nga Belinda Balluku.

Ministër i Mbrojtjes u emërua Ermal Nufi, i cili zëvendëson në këtë detyrë Pirro Vengun.

Burimi ATSH