Ministrja e Ekonomisë dhe Inovacionit, Delina Ibrahimaj, zhvilloi një takim me përfaqësues të Autoritetit Kombëtar të Ushqimit (AKU) dhe prodhues të sektorit ushqimor, ku në fokus ishin problematikat me të cilat përballen bizneset gjatë aktivitetit të tyre.

Në takim u diskutua veçanërisht për çështjet që lidhen me etiketimin e produkteve dhe sigurinë ushqimore, si dy elemente të rëndësishme për funksionimin e sektorit dhe mbrojtjen e konsumatorit.

Ibrahimaj theksoi rëndësinë e dialogut të drejtpërdrejtë me bizneset për identifikimin e problematikave dhe adresimin e tyre në praktikë.

“Dialogu me biznesin na ndihmon të adresojmë problematikat në praktikë dhe të përmirësojmë proceset, duke garantuar sigurinë dhe mbrojtjen e konsumatorit”, u shpreh ministrja.

Takime të tilla synojnë të evidentojnë problematikat që hasen në zbatimin e kërkesave rregullatore, si dhe të kontribuojnë në përmirësimin e proceseve që lidhen me sektorin ushqimor.

Etiketimi i produkteve ushqimore dhe respektimi i kërkesave për sigurinë ushqimore janë pjesë e kuadrit rregullator që synon të garantojë informimin e konsumatorit mbi produktin dhe mbrojtjen e shëndetit publik.

/Burimi ATSH