Ministri i Drejtësisë, Toni Gogu, zhvilloi një takim me punonjës të sistemit penitenciar, ku ka vënë theksin te siguria në institucionet e vuajtjes së dënimit, përgjegjësia dhe kushtet e punës për personelin.

Përmes një reagimi në rrjetet sociale, Gogu deklaroi se puna e përditshme e punonjësve të burgjeve kërkon vigjilencë dhe përgjegjësi të lartë.

“U kërkojmë siguri brenda burgjeve, vigjilencë çdo orë dhe zero tolerancë ndaj paligjshmërisë. Të njëjtën përgjegjësi duhet ta kemi edhe ne ndaj tyre”, shkruan ministri.

Sipas tij, punonjësit që mbajnë këtë detyrë çdo ditë duhet të kenë kushtet, mbështetjen dhe trajtimin që u takon.

Gogu u bëri gjithashtu thirrje për aplikimin deri më 20 shtator për 20 kredi të buta me interes 0%, duke e cilësuar këtë si një mundësi për punonjësit që kanë nevojë për mbështetje.

“U bëra thirrje të aplikojnë deri më 20 shtator për 20 kreditë e buta me interes 0%, një mundësi e mirë për disa prej atyre që kanë nevojë”, shprehet.

Ministri tha se gjatë takimit ishte i pranishëm për t’i dëgjuar drejtpërdrejt për punën që bëjnë, shqetësimet që ngritën dhe çfarë duhet të bëjmë më mire.

Burimi ATSH