Me rastin e Ditës Ndërkombëtare të Shkrim-Leximit, Drejtoria e Përgjithshme e Arkivave (DPA) ka prezantuar sot një ekspozitë dokumentare, që ilustron rrugëtimin e gjuhës shqipe, nga alfabeti deri në standardizim.

Dëshmi historike që datojnë që prej Luftës së Parë Botërore e deri pas mbajtjes së Kongresit të Drejtshkrimit u paraqitën në Auditor, në prani të drejtoreshës së shkollës 9-vjeçare “7 Marsi”, Alma Hamzallari, të një grupi mësuesesh të këtij institucioni arsimor, të studentëve, të nxënësve dhe të qytetarëve të tjerë të interesuar.

Në përputhje me simbolikën e 8 Shtatorit, ekspozita i kushtoi vëmendje të posaçme përpjekjeve të shtetit shqiptar për të luftuar analfabetizmin dhe hapat e ndërmarrë në këtë drejtim, duke i dhënë përparësi të veçantë shkollimit të grave, të shqiptarëve në “tokat e lirume” dhe të burgosurve.

Promovimi i trashëgimisë dokumentare, përbën një prej pikërëndesave të veprimtarisë së DPA-së, e cila përmes sallës së Auditorit, fton të rinjtë të njohin të shkuarën duke inkurajuar dialogun ndërmjet brezave. Më herët, ekspozita të kësaj tematike janë mbajtur edhe në qytete të tjera të vendit, por edhe në Prishtinë, në Shkup etj., në jubile të rëndësishëm për kombin.

Marrë nga ATSH