Tradita shqiptare dhe eksperienca italiane janë ndërthurur në një agroturizëm të ri në Kavajë, që po tërheq vëmendjen e turistëve vendas dhe të huaj.

“Sacro e Profano” sjell një koncept të lidhur me gastronominë, mikpritjen dhe produktet lokale, duke promovuar njëkohësisht turizmin rural dhe prodhimet shqiptare.

Kryeministri Edi Rama ka promovuar përmes një postimi në rrjetet sociale agroturizmin “Sacro e Profano” në Kavajë, një sipërmarrje e krijuar nga rikthimi në Shqipëri i Xhovani Ziut, pas një eksperience shumëvjeçare në Itali.

Sipas Kryeministrit Rama ky agroturizëm është një shembull i ndërthurjes së traditës shqiptare me eksperiencën dhe finesën e kuzhinës italiane, duke krijuar një ofertë të veçantë për vizitorët vendas dhe të huaj.

“Me 8 dhoma, produkte të freskëta nga fermerët e zonës dhe bashkëpunim me kantina shqiptare, ky agroturizëm ofron një eksperiencë të veçantë gastronomike dhe mikpritjeje.

Një destinacion që po tërheq gjithnjë e më shumë turistë të huaj dhe promovon turizmin rural e produktet shqiptare”, shkruan Rama.

Agroturizmi synon të ndërthurë mikpritjen, gastronominë dhe turizmin rural, duke u ofruar vizitorëve mundësinë të shijojnë produkte shqiptare dhe gatime të frymëzuara nga tradita të ndryshme kulinare.

Rikthimi i profesionistëve shqiptarë me përvojë jashtë vendit dhe investimi në agroturizëm janë shndërruar vitet e fundit në një komponent të rëndësishëm të zhvillimit të turizmit në zonat rurale, duke krijuar mundësi të reja për ekonominë lokale dhe promovimin e produkteve shqiptare.

Kavaja, me pozicionin e saj pranë bregdetit dhe zonave rurale, po zgjeron gradualisht ofertën turistike përtej turizmit tradicional, përmes strukturave që kombinojnë akomodimin, gastronominë dhe përvojat e lidhura me prodhimin vendas.

Marrë nga ATSH