Turizmi natyror në vendin tonë po shënon rritje, ndërsa gjithnjë e më shumë vizitorë po zgjedhin parqet kombëtare dhe zonat e mbrojtura për të eksploruar pasuritë natyrore të vendit.

Në një videomesazh në rrjetet sociale, ministri i Mjedisit, Sofjan Jaupaj solli në vëmendje disa prej destinacioneve natyrore që mund të vizitohen gjatë fundjavës, që nga Parku Kombëtar Divjakë-Karavasta, te Parku Kombëtar i Llogorasë dhe Alpet Shqiptare.

Jaupaj nënvizon se Divjakë-Karavasta ofron mundësinë për të shijuar lagunën dhe biodiversitetin e saj, përfshirë pelikanin kaçurrel, ndërsa në Llogora “mali takohet me detin”.

“Mund të vizitoni parkun kombëtar Divjak-Karavasta mes lagunës, pyllit dhe Pelikanit Kaçurrel, Parkun Kombëtar të Llogorasë, ku mali takohet me detin ose parkun kombëtar të Alpeve në veri për natyrën dhe peizazhet e jashtëzakonshme. Në të gjitha këto zona ne kemi qendrat e vizitorëve dhe administratat tona të Zonave të Mbrojtura janë në terren, të gatshme për t’ju orientuar dhe për t’ju njohur me vlerat e çdo parku”, shtoi ai.

Sipas ministrit, turizmi natyror në Shqipëri po rritet bashkë me numrin e vizitorëve që zgjedhin zonat tona të mbrojtura.

“Kjo është një mundësi e madhe, por edhe përgjegjësi për të gjithë”, shprehet Jaupaj.

Jaupaj u bëri apel vizitorëve të tregohen të kujdesshëm gjatë qëndrimit në natyrë, të mos lënë mbetje, të mos ndezin zjarre dhe të respektojnë habitatet dhe biodiversitetin.

“Këtë të diel zgjidhni natyrën, shijojeni, por edhe mbrojeni atë”, apeloi ministri i Mjedisit.

Marrë nga ATSH