Ministri i Turizmit, Kulturës dhe Sportit, Blendi Gonxhja vizitoi sitin arkeologjik të Mozaikut të Tiranës, ku u prezantua zyrtarisht aktivizimi i kësaj hapësire të re digjitale në Tiranë, nënshtruar restaurimit, ndërthurur me kërkimin shkencor dhe teknologjinë digjitale.

Gjatë vizitës u theksua se, pas një periudhe të gjatë me vëmendje të kufizuar, Mozaiku i Tiranës po shndërrohet në një hapësirë moderne interpretimi, ku e shkuara vendoset në dialog me të tashmen. Teknologjia vihet në funksion të monumentit, duke e bërë historinë më të aksesueshme dhe më të kuptueshme për vizitorët.

Projekti përfshin tri risi kryesore: rindërtimin tredimensional të vilës romake mbi gjurmët e saj origjinale, instalacione digjitale interaktive që ofrojnë një përvojë të re për vizitorët, si dhe përdorimin, për herë të parë në Shqipëri, të teknologjisë Gigapixel për dokumentimin dhe rindërtimin digjital të Mozaikut të Tiranës dhe mozaikut të Eksonarteksit të Katedrales së Bylisit.

Me këtë ndërhyrje, Mozaiku i Tiranës rikthehet jo vetëm si një monument i restauruar, por edhe si një model bashkëkohor i interpretimit të trashëgimisë kulturore, ku ruajtja, inovacioni dhe kërkimi shkencor bashkëjetojnë në funksion të publikut.

Burimi ATSH