Kryeministri Edi Rama kërkoi sot zbatimin e ligjit për përfshirjen në administratën shtetërore të personave me aftësi të kufizuar.

Kryeministri Rama ishte sot në Qendrën Sociale “Jonathan”, ku bashkëbisedoi me nëna dhe stafin mbështetës të fëmijëve dhe të rinjve me aftësi të kufizuar, mbi dyfishimin e mbështetjes ekonomike për këtë kategori, si dhe për garancitë e reja shëndetësore e shoqërore për kujdestarët e tyre.

Sipas kryeministrit, Shqipëria e ka vendosur me ligj rekrutimin e personave me aftësi të kufizuar në administratë, por kjo nuk zbatohet si duhet.

“Ka dhe një të metë tjetër të madhe, që ne kemi vendosur në ligj, por nuk e zbatojmë si duhet, as sa duhet, rekrutimin e personave me aftësi të kufizuar në administratë. E kemi në ligj të vendosur. Vendet europiane e kanë të gjitha. Për shembull Holanda, se kam parë statistika. Holanda e ka në nivele të paimagjinueshme”, tha Rama.

Sipas tij, duhet të bëhet edhe një sforco ekstra që të zbatohet më mirë ligji.

“Ky është problem më vete sepse është iluzion të mendosh që ata do t’i mirëpresë sektori privat dhe do t’i përshijë prandaj dhe të gjitha vendet ia kanë lënë administratës barrën kryesor që t’i integrojë sepse në sektorin privat është më vështirë”, tha Rama.

Burimi ATSH