Ministri i Financave, Petrit Malaj, deklaroi sot në Kuvend se ratifikimi i Marrëveshjes së Garancisë ndërmjet Republikës së Shqipërisë dhe Bankës Evropiane për Rindërtim dhe Zhvillim (BERZH) do të mundësojë financimin e një projekti strategjik për ndërtimin e nënstacionit të ri 110/20 kV të OSHEE Group në qendër të Tiranës, me synim forcimin e sigurisë energjetike dhe modernizimin e rrjetit të shpërndarjes.

Gjatë prezantimit të projektligjit, Malaj tha se investimi është pjesë e vizionit të qeverisë për ndërtimin e një sistemi energjetik modern, inteligjent dhe të qëndrueshëm.

“Përmes zbatimit të këtij projekti, rrisim sigurinë e furnizimit me energji, përmirësojmë cilësinë e rrjetit dhe përgatisim sistemin për sfidat e dekadës së ardhshme. Nënstacioni do të jetë plotësisht i digjitalizuar dhe nëntokësor, duke rritur eficiencën operacionale, reduktuar humbjet teknike dhe krijuar kapacitetet e nevojshme për integrimin e burimeve të reja të energjisë së rinovueshme”, u shpreh ministri.

Malaj vlerësoi progresin e sektorit energjetik në vitet e fundit, duke theksuar se humbjet në rrjet janë ulur nga rreth 45% në vitin 2013 në 16,9% në vitin 2025, falë reformave dhe investimeve në transmetim e shpërndarje, si dhe zgjerimit të kapaciteteve të energjisë diellore dhe të erës.

Sipas ministrit, marrëveshja parashikon një hua prej 22,5 milionë eurosh, me afat ripagimi 10-vjeçar dhe normë interesi të ndryshueshme, bazuar në Euribor 6-mujor plus një marzh prej 1%.

“Garancia shtetërore nuk përfaqëson një shpenzim buxhetor. Ajo shërben për të mundësuar financimin e një investimi strategjik me kosto më të ulët, duke i dhënë OSHEE-së akses në kushte financimi që nuk do të ishin të mundshme në tregun komercial”, theksoi Malaj.

Në përfundim, ai u shpreh se projekti do të garantojë furnizim më të sigurt me energji për Tiranën, do të rrisë fleksibilitetin e rrjetit, do të mbështesë integrimin e energjisë së rinovueshme dhe do ta afrojë më tej sistemin energjetik shqiptar me standardet e Bashkimit Evropian.

Burimi ATSH