Ambasadori i Shqipërisë në Zvicër, Ermal Dredha , mori pjesë në ceremoninë zyrtare të themelimit të shoqatës “Alba Health” në Zyrih, e cila bashkon kompanitë shqiptare të Spitex-ve në Zvicër, ofruese të shërbimeve të kujdesit shëndetësor dhe social në shtëpi.

Në fjalën e tij përshëndetëse, përpara përfaqësuesve të institucioneve, trupit diplomatik dhe qindra të ftuarve, Ambasadori Dredha vlerësoi këtë nismë si një shembull të bashkëpunimit, organizimit dhe profesionalizmit të komunitetit shqiptar në Zvicër. Ai theksoi se kontributi i shqiptarëve në fusha të ndryshme të jetës ekonomike dhe shoqërore përfaqëson një model të suksesshëm integrimi, duke shërbyer si një urë lidhëse mes Zvicrës dhe Shqipërisë.

Ambasadori shprehu gjithashtu vlerësimin për z. Ekrem Hasani, iniciator dhe President i “Alba Health”, duke e cilësuar angazhimin e tij si një dëshmi të sipërmarrjes, përgjegjësisë sociale dhe suksesit të shqiptarëve në shtetin helvetik.

Ambasada, përgëzon “Alba Health” për këtë hap të rëndësishëm dhe i uron suksese në misionin e saj në shërbim të komunitetit dhe të gjithë qytetarëve që kanë nevojë për kujdes shëndetësor në shtëpi.