Ambasadori i Bashkimit Evropian në Shqipëri, Silvio Gonzato, mori pjesë në ceremoninë përmbyllëse të procesit kalimtar të gjyqtarëve dhe prokurorëve.

Në aktivitetin ku të pranishëm ishin edhe zëvendëskryeministrja Albana Koçiu dhe kryetari i Kuvendit Niko Peleshi, Gonzato tha se nëntë vite më parë Shqipëria nisi një rrugëtim të paprecedent për nga shtrirja, kompleksiteti dhe ambicia, duke theksuar se ky proces kërkoi guxim politik, qëndrueshmëri institucionale dhe angazhimin e të gjithë aktorëve të përfshirë.

Gonzato tha se “Bashkimi Evropian dhe partnerët ndërkombëtarë e kanë shoqëruar Shqipërinë gjatë gjithë këtij procesi përmes Operacionit Ndërkombëtar të Monitorimit, duke ofruar ekspertizë, mbikëqyrje dhe mbështetje të vazhdueshme”.

Gonzato nënvizoi se procesi i vetingut ka sjellë rezultate të prekshme dhe historike, ndërsa tashmë janë përfunduar të gjitha çështjet në shkallë të parë dhe janë shqyrtuar përfundimisht të gjitha ankimet.

“Qindra raste janë vlerësuar sipas standardeve rigoroze të vlerësimit të pasurisë, integritetit dhe kompetencës profesionale, duke dëshmuar se askush nuk është mbi përgjegjësinë dhe llogaridhënien, si dhe se pavarësia e gjyqësorit duhet të ecë krah për krah me përgjegjësinë, integritetin dhe etikën profesionale”, tha ai.

Ambasadori i BE-së vlerësoi punën e institucioneve shqiptare të përfshira në proces, veçanërisht Komisionin e Pavarur të Kualifikimit, Kolegjin e Posaçëm të Apelimit, Komisionerët Publikë dhe strukturat mbështetëse.

“Kjo arritje u përket institucioneve shqiptare që mbajtën mbi supe këtë përgjegjësi të jashtëzakonshme: Komisionit të Pavarur të Kualifikimit, Kolegjit të Posaçëm të Apelimit, Komisionerëve Publikë dhe të gjitha institucioneve mbështetëse. Vlerësoj përkushtimin dhe profesionalizmin e gjyqtarëve të Kolegjit të Posaçëm të Apelimit. Puna e tyre kërkoi ekspertizë juridike, por edhe integritet dhe pavarësi përballë një vëmendjeje të jashtëzakonshme publike”, vijoi Gonzato.

Duke folur për fazën e ardhshme, ambasadori Gonzato theksoi se përfundimi i vetingut nuk përbën fundin e reformës në drejtësi, por shënon nisjen e një etape të re.

Sipas tij, sfida kryesore tashmë mbetet ruajtja dhe konsolidimi i standardeve të vendosura gjatë procesit të rivlerësimit.

“Mekanizmat e reformës së vitit 2016 u konceptuan si instrumente kalimtare. Misioni i tyre përmbyllet sot, por standardet që vendosën do të mbeten dhe do të vazhdojnë të udhëheqin sistemin e drejtësisë. Standardet e vendosura nga vetingu duhet të shndërrohen në tipare të përhershme të sistemit shqiptar dhe jo të mbeten thjesht kujtim i një periudhe të jashtëzakonshme. Përparimi në sundimin e ligjit nuk matet nga reformat e shkruara në letër; ai matet nga besimi që qytetarët kanë se drejtësia në Shqipëri është e drejtë, e paanshme dhe e aksesueshme për të gjithë”, përfundoi Gonzato.

Burimi ATSH