Programi EU4Schools i Bashkimit Evropian me një fond prej 75 milionë euro bëri të mundur rindërtimin dhe rehabilitimin e 63 institucioneve arsimore në 11 bashkitë më të prekura nga tërmeti.

Në aktivitetin e organizuar sot, me rastin e përfundimit të këtij programi, ishin të pranishëm ambasadori i BE-së në Shqipëri, Silvio Gonzato, zëvendëskryeministrja Albana Koçiu, ministri i Shtetit për Pushtetin Vendor, Ervin Demo, ministrja e Arsimit, Mirela Kumbaro, përfaqësuesja e përhershme e UNDP-së në Shqipëri, Randi Davis, kryetarë bashkish, partnerë, mësues, prindër dhe nxënës.

Në fjalën e tij Gonzato theksoi se “kur tërmeti goditi Shqipërinë, Bashkimi Evropian qëndroi pranë shqiptarëve që nga dita e parë. Brenda pak orësh, ekipet e shpëtimit dhe ndihma emergjente nga shtetet anëtare të BE-së mbërritën në vend. Ky solidaritet nuk u ndal me përfundimin e emergjencës. Përmes EU4Schools, ne ndihmuam komunitetet të rimëkëmben dhe të ndërtojnë një të ardhme më të sigurt. Ne nuk restauruam thjesht ndërtesa; ndërtuam qëndrueshmëri dhe krijuam mundësi për mësimdhënie më moderne, gjithëpërfshirëse dhe cilësore”.

“Sot, ne shënojmë mbylljen e këtij projekti, por angazhimi i Bashkimit Evropian ndaj Shqipërisë nuk përfundon këtu. Ne do të vazhdojmë të mbështesim të rinjtë shqiptarë që të arrijnë ambiciet e tyre përmes arsimit cilësor dhe formimit profesional”, tha ambasadori i BE-së në Shqipëri, Silvio Gonzato.
Zv/kryeministrja Koçiu u shpreh se “Programi EU4Schools, i cili lindi si një përgjigje solidariteti pas tërmetit të vitit 2019, sot përmbyllet si një histori suksesi europiane e shkruar në Shqipëri, me fëmijët dhe arsimin në qendër. Me një investim prej 75 milionë euro për rindërtimin dhe modernizimin e 63 shkollave për mbi 25 mijë nxënës, ky program është kthyer jo vetëm në një model bashkëpunimi, por edhe në një dëshmi të qartë të vizionit dhe besimit të përbashkët për të ardhmen europiane të Shqipërisë”.
Ndërsa minstri Demo tha se “në aktivitetin përmbyllës të programit EU4Schools, një prej ndërhyrjeve më domethënëse të rindërtimit pas tërmetit të vitit 2019 ndamë mesazhin se investimet në arsim janë investime në sigurinë, dinjitetin dhe të ardhmen e fëmijëve tanë”.
“Roli i bashkive mbetet thelbësor jo vetëm në administrimin, por edhe në mirëmbajtjen afatgjatë të këtyre aseteve publike, që duhet të vijojnë t’u shërbejnë komuniteteve me të njëjtin standard për të cilin u ndërtuan”, theksoi Demo.
Ministrja e Arsimit, Mirela Kumbaro tha se “ky program nuk rindërtoi vetëm shkolla, por edhe besimin, sigurinë dhe mundësitë për brezat. Ndërkohë partneriteti mes Shqipërisë dhe Bashkimit Evropian do të vazhdojë të japë fryte konkrete për qytetarët”.

Pas tërmetit të 26 nëntorit 2019, shumë komunitete u përballën me sfidën jo vetëm për të riparuar dëmet, por edhe për t’iu rikthyer normalitetit pas një goditjeje të rëndë. Për mijëra fëmijë, mësues dhe familje, kjo nënkuptonte edhe rikthimin në bankat e shkollave në kushte të sigurta. EU4Schools ishte përgjigjja e Bashkimit Evropian ndaj kësaj nevoje dhe programi më i madh i investimit të BE-së në sektorin e arsimit në Shqipëri.

Burimi ATSH