Ministrja e Ekonomisë dhe Inovacionit, Delina Ibrahimaj mori pjesë në aktivitetin “Green & Digital Innovation”, ku theksoi rolin gjithnjë e më të rëndësishëm të startup-eve në transformimin e ekonomisë shqiptare drejt inovacionit, teknologjisë dhe zhvillimit të qëndrueshëm.

Në fjalën e saj, Ibrahimaj nënvizoi se, përmes mbështetjes së vazhdueshme të qeverisë shqiptare dhe partnerëve europianë po ndërtohet një ekosistem që krijon mundësi për sipërmarrësit e rinj të zhvillojnë ide, produkte dhe shërbime me potencial për tregun vendas dhe atë ndërkombëtar.

Ajo vlerësoi historitë e suksesit të startup-eve shqiptare si QELQ, EKOFUNGI, Alter Ego, Brisk Square dhe Match4Research, të cilat, sipas saj, dëshmojnë se talenti, kreativiteti dhe inovacioni shqiptar po sjellin zgjidhje konkrete në fusha të tilla si ekonomia qarkulluese, inteligjenca artificiale, teknologjitë digjitale dhe kërkimi shkencor.

Ibrahimaj theksoi se, investimi në inovacion, në ekonominë e dijes dhe në transformimin e gjelbër e digjital përbën një investim të drejtpërdrejtë në rritjen e konkurrueshmërisë së ekonomisë shqiptare, krijimin e vendeve të reja të punës me vlerë të shtuar dhe në ndërtimin e një të ardhmeje më të mirë për vendin.

Aktiviteti “Green & Digital Innovation” mblodhi përfaqësues të institucioneve, sipërmarrjes dhe ekosistemit të inovacionit, me fokus promovimin e zgjidhjeve të reja teknologjike dhe zhvillimit të qëndrueshëm në Shqipëri.

Burimi ATSH