Në një atmosferë festive dhe miqësore, në ambientet e Qendrës Shqiptare për Fëmijët me Nevoja të Veçanta në Elbasan u organizua aktiviteti me rastin e “Salvation Day” të Republikës së Azerbajxhanit, duke bashkuar institucione vendore, përfaqësues të komunitetit dhe fëmijë në një ditë solidariteti dhe gëzimi.

Me mbështetjen e Ambasadës së Republikës së Azerbajxhanit në Shqipëri, u shpërndanë dhurata për 50 fëmijë me nevoja të veçanta. Gjithashtu, fëmijëve iu ndanë certifikata dhe çmime vlerësimi për pjesëmarrjen dhe angazhimin e tyre.

Në aktivitet morën pjesë përfaqësues të Prefekturës së Elbasanit, Këshillit të Qarkut Elbasan, institucioneve vendore, si dhe përfaqësues të shoqërisë civile.

Gjatë fjalës së tij, Shkëlqesia e Tij, Ambasadori i Republikës së Azerbajxhanit në Shqipëri, z. Anar Huseynov, theksoi se aktivitete të tilla kontribuojnë në forcimin e marrëdhënieve të miqësisë ndërmjet dy popujve dhe dëshmojnë partneritetin e ngushtë mes Azerbajxhanit dhe Shqipërisë.

“Ky aktivitet forcon miqësinë midis popujve tanë. Mbështetja e Azerbajxhanit për Shqipërinë ka qenë dhe mbetet e pranishme në të gjitha aspektet e bashkëpunimit, duke reflektuar marrëdhëniet e shkëlqyera që ekzistojnë ndërmjet vendeve tona,” u shpreh ambasadori Huseynov.

Presidentja e Qendrës Shqiptare për Fëmijët me Nevoja të Veçanta, Dr. Rudina Çollaku, përcolli urimet e saj për popullin dhe shtetin e Azerbajxhanit, duke theksuar marrëdhëniet e shkëlqyera ndërmjet dy vendeve.

“Shqipërinë dhe Azerbajxhanin nuk i bashkon vetëm miqësia, por edhe kultura, traditat, arti dhe vlerat e përbashkëta. Azerbajxhani është një portë e rëndësishme për Shqipërinë drejt Azisë Qendrore, ndërsa Shqipëria përbën një portë të natyrshme të Azerbajxhanit drejt Ballkanit Perëndimor,” u shpreh Dr. Çollaku.

Aktiviteti u mbyll me një program artistik dhe momente festive, duke përcjellë mesazhe miqësie, bashkëpunimi dhe solidariteti.