Ministri i Mjedisit, Sofjan Jaupaj mori pjesë si folës kryesor në edicionin e 17-të të forumit “Monaco Blue Initiative”, nën patronazhin e Lartësisë së Tij, Princit Albert II dhe Princeshës Charlene të Monacos.

Monaco Blue Initiative mblodhi përfaqësues të institucioneve financiare botërore, akademisë, organizatave ndërkombëtare dhe politikëbërës nga e gjithë bota për të diskutuar mbi të ardhmen e oqeaneve dhe deteve në dritën e Marrëveshjes së re për Biodiversitetin Përtej Juridiksionit Kombëtar (BBNJ), si një instrument kyç për mbrojtjen e biodiversitetit përtej juridiksionit kombëtar.

Në këtë forum prestigjioz ndërkombëtar, Shqipëria prezantoi vizionin dhe politikat e saj mjedisore për mbrojtjen e biodiversitetit, forcimin e zonave të mbrojtura dhe rolin që diplomacia mjedisore luan sot në bashkimin e vendeve për një të ardhme më të qëndrueshme e më të sigurt për brezat që vijnë.

“Shqipëria beson se mbrojtja e natyrës dhe diplomacia mjedisore janë sot jo vetëm një përgjegjësi globale, por edhe një mundësi për të ndërtuar ura bashkëpunimi mes kombeve”, tha Jaupaj në një postim në rrjetet sociale.

“Monaco Blue Initiative” është një platformë unike për debat që bashkon aktorët kryesorë në ruajtjen dhe qeverisjen e oqeaneve.

Përfaqësuesit e qeverive, organizatave ndërkombëtare, shoqërisë civile, OJQ-ve, sektorit privat, komunitetit shkencor dhe medias takohen çdo vit për të eksploruar dhe promovuar sinergjitë midis mbrojtjes së mjedisit detar dhe zhvillimit të një ekonomie blu vërtet të qëndrueshme.