Kryeministri Edi Rama deklaroi sot se sistemi i prokurimit publik në Shqipëri konsiderohet nga ekspertët e Komisionit Europian si sistemi më i mirë i prokurimit publik në Ballkanin Perëndimor.

Rama ishte i pranishëm në firmosjen e marrëveshjes për linjën e re të financimit ndërmjet Bankës Europiane të Investimeve dhe Intesa Sanpaolo Bank Albania, për të mbështetur bizneset e vogla e të mesme

Në fjalën e mbajtur me këtë rast, Kryeministri theksoi se “jemi edhe shumë krenarë që kemi kryer një transformim kaq të jashtëzakonshëm të sistemit tonë të prokurimit publik”.

“Sistemi ynë i prokurimit publik tashmë konsiderohet nga Komisioni Evropian, ekspertët e Komisionit Evropian, konkretisht nga Sigma dhe OECD-ja, si sistemi më i mirë i prokurimit publik në Ballkanin Perëndimor”, theksoi Rama.

Ndërkohë sipas tij, është në mesataren e sistemeve shteteve anëtare të Bashkimit Europian.

Kryeministri u ndal edhe tek arritjet e vendit në transformimin e ofrimit të shërbimeve.

“Jemi krenarë që kemi bërë gjëra që kanë ndryshuar marrëdhënien midis individit dhe shtetit, duke transformuar shërbimet tona në një platformë të mirëfilltë digjitale të qeverisjes. Kjo i jep mundësi qytetarëve që 95% të shërbimeve ta marrin online”, tha Rama.

Burimi ATSH