Kryeministri Edi Rama nënvizoi sot rëndësinë e forcimit të rolit të bashkive në procesin e anëtarësimit në Bashkimin Europian.

Këtij synimi, sipas tij, i shërben edhe lançimi i programit “EU4Municipalities II” Europa apo Bashkimi Europian për pushtetin vendor, faza e dytë, një program i mbështetur nga Bashkimi Europian, që lidhet drejtpërdrejtë me modernizimin e qeverisjes vendore.

Gjatë podkastit “Flasim”, kryeministri u ndal në këtë zhvillim të rëndësishëm gjatë javës së kaluar, i cili sipas tij, synon “rritjen e kapaciteteve të bashkive për t’u bërë më të gatshme që të jenë konkurruese në përpjekjen për të thithur më shumë nesër fonde nga Bashkimi Europian”.

“Ky program bën pikërisht urën ndihmëse për të përcjellë më shumë dije nga Bashkimi Europian drejt bashkive tona, për të rritur vetëdijen e tyre, për rolin që kanë në raport me Bashkimin Europian në një vend që nesër bëhet anëtar i Bashkimit Europian”, tha Rama.

Për këtë arsye, kryeministri shprehu besimin se ky program është një fakt që vjen në kohën e duhur si pjesë e tërësisë së fakteve që provojnë se Bashkimi Europian është gjithmonë e më pranë, se Shqipëria është gjithmonë e më shumë një vend që shihet si anëtar i Bashkimit Europian, jo në të ardhmen e largët, por në vitet që vijë.

Marrë nga ATSH