Ministri i Mjedisit, Sofjan Jaupaj, priti në takim bilateral homologun nga Mali i Zi, Damjan Ćufalić, në kuadër të konferencës ndërkombëtare United for Climate, që u zhvillua në Tiranë.

Gjatë takimit u riafirmuan marrëdhëniet shumë të mira mes dy vendeve dhe angazhimi i përbashkët për mbrojtjen e mjedisit dhe avancimin e procesit të integrimit europian.

Jaupaj tha se në fokus të takimit me ministrin Ćufalić, ishte forcimi i bashkëpunimit për mbrojtjen e ekosistemeve ndërkufitare, me fokus të veçantë te Liqeni i Shkodrës dhe lumi Buna, si dhe mbi menaxhimin e qëndrueshëm të burimeve natyrore.

Një tjetër pikë e rëndësishme e bisedimeve ishte koordinimi në kuadër të Kapitullit 27 të acquis të Bashkimit Europian dhe zbatimi i Agjendës së Gjelbër për Ballkanin Perëndimor.

“Gjatë takimit u vlerësua se shkëmbimi i eksperiencave dhe zhvillimi i projekteve të përbashkëta rajonale mbeten thelbësore për një të ardhme më të gjelbër, më të qëndrueshme dhe më të integruar europianisht për rajonin”, tha ministri Jaupaj.

Marrë nga ATSH