Ministrja e Ekonomisë dhe Inovacionit, Delona Ibrahimaj deklaroi sot se ndryshimet në ligjin “Për inspektimin” janë një tjetër hap në funksion të reformimit të administratës publike dhe procesit të integrimit europian të vendit.

Gjatë prezantimit të ndryshimeve në ligj në seancën plenare të Kuvendit, Ibrahimaj theksoi se procesi i integrimit nuk është “as fasadë dhe as slogan”, por një punë e përditshme e qindra punonjësve të administratës publike për modernizimin e shtetit dhe forcimin e institucioneve.

Sipas saj, integrimi europian lidhet me reformimin rrënjësor të legjislacionit, koordinimin më të mirë të institucioneve dhe rritjen e përgjegjshmërisë ndaj qytetarëve dhe biznesit.

“E gjithë kjo punë bëhet për përfitimin e qytetarëve dhe bizneseve shqiptare”, u shpreh Ibrahimaj, ndërsa shtoi se përbaltja e këtij procesi “çon në regres dhe jo në progres”, tha ministrja.

Ministrja bëri të ditur se ndryshimet në ligjin e inspektimeve vijnë si rezultat i rekomandimeve të Sigma-s, i cili analizon administratën publike dhe jep rekomandime për përmirësimin e saj.

Sipas propozimit, Inspektorati Qendror do të kalojë nga varësia e Kryeministrisë në varësinë e Ministrisë së Ekonomisë dhe Inovacionit.

Ibrahimaj theksoi se marrëdhënia mes administratës dhe biznesit mbështetet në tri shtylla kryesore: hartimin e legjislacionit, ofrimin e shërbimeve dhe monitorimin e zbatimit të ligjeve.

Ajo nënvizoi se qeveria është fokusuar në digjitalizimin e shërbimeve për të ulur kontaktet direkte me administratën, burokracitë dhe për të rritur efikasitetin për bizneset.

Ministrja vlerësoi reformën e inspektimeve si thelbësore për rritjen e monitorimit pa shtuar barrën ndaj biznesit, duke garantuar më shumë koordinim institucional, transparencë dhe mbrojtje të të drejtave të sipërmarrjes.

“Inspektimet ndikojnë çdo ditë në klimën e biznesit, konkurrencën në treg, formalizimin e ekonomisë, mbrojtjen e konsumatorit dhe besimin e investitorëve”, deklaroi Ibrahimaj.

Ministrja vuri në dukje se projektligji përfaqëson një hap më shumë drejt synimit të përbashkët për anëtarësimin e Shqipërisë në Bashkimi Europian.

Burimi ATSH