Kryeministri Edi Rama mori pjesë sot në homazhet shtetërore që u zhvilluan në mjediset e Teatrit Kombëtar të Operës e Baletit, në nderim të ish-kryetarit të Kuvendit, Servet Pëllumbi, i cili u nda nga jeta një ditë më parë në moshën 89-vjeçare.

Në fjalën e rastit kryeministri vlerësoi se Servet Pëllumbi do të mbetet një pikë referimi në historinë e ndryshimit të epokave dhe një pikë referimi edhe për të gjithë ata që do të duan të kuptojnë dinamikat dhe historinë e vetë Partisë Socialiste.

“Unë profesorin e kam njohur pak dhe përgjithësisht nga larg. Për hir të së vërtetës dua të kujtoj se marrëdhënia ime me të është një marrëdhënie tipike e një antipatie reciproke në distancë dhe pastaj një simpatie reciproke në afërsi. Vite më parë profesori përfaqësonte gjithçka që unë nuk simpatizoja: konservator, marksist-leninist, sovjetik e të gjitha ato që e shoqëronin figurën e tij kur vinte fjala për sulmet e etiketimet që i bëheshin”, tha Rama.

Ndërkohë kryeministri vlerësoi se në përballje me realitetin e njeriut përtej etiketimeve dhe kornizimit të tij në sferën publike, ka njohur një njeri shumë progresist, shumë dashamirës ndaj kujtdo që përpiqej të bënte diçka ndryshe dhe një njeri solidar me të në momente të vështira”.

“Befasisht shfaqej në ekranin e celularit tim në mënyrë të papritur duke më çuar fjalë inkurajuese dhe duke më ndihmuar të shosh se përtej një momenti të vështirë, ishte një kategori njerëzish të cilët përcillnin qetësi dhe mendjemprehtësi”, vlerësoi Rama.

Rama vlerësoi se kujtimi që ai lë mbrapa për të gjithë është se do ta kujtojnë si një burrë të mirë, të ndershëm, të mençur dhe mbi të gjitha si një burrë babaxhan.

Marrë nga ATSH