Kryeministri Edi Rama bëri të ditur sot se, Shqipëria ka hedhur një hap të ri në drejtim të rritjes së kapaciteteve ushtarake dhe ripozicionimit në industrinë mbrojtëse.

Në rubrikën “Shënimet e Javës”, përmes një videoje të publikuar nga Berlini, Rama u shpreh se një nga momentet më të rëndësishme të javës ishte nënshkrimi i marrëveshjes mes kompanisë italiane “Fincantieri” dhe kompanisë publike shqiptare “KAYO”.

Kryeministri theksoi se, kjo nismë shënon një rikthim të Shqipërisë në hartën e industrisë ushtarake dhe një hap të rëndësishëm drejt forcimit të rolit të saj në kuadër të bashkëpunimit me partnerët ndërkombëtarë.

Sipas tij, marrëveshja parashikon prodhimin e mjeteve detare në Shqipëri, në kantierin e Pashalimanit, si për nevojat e Forcat e Armatosura të Republikës së Shqipërisë, ashtu edhe për forcat aleate.

Kryeministri theksoi se ky projekt përbën jo vetëm një investim të rëndësishëm në industrinë ushtarake, por edhe një mundësi konkrete për zhvillimin ekonomik dhe rritjen e punësimit.

“Ky nuk është vetëm një investim i ri dhe shumë i konsiderueshëm, por edhe një front i ri punësimi me rreth 400 vende të reja pune të mirëpaguara në fazën e parë”, u shpreh Rama.

Ai shtoi se marrëveshja krijon perspektivë për të rinjtë, veçanërisht për nxënësit e shkollave profesionale, të cilët do të përfshihen në programe trajnimi për t’u bërë pjesë e kompanisë së përbashkët “Fincantieri Albania” që do të ngrihet në kuadër të këtij bashkëpunimi.

Burimi ATSH