Në zonën e Belshit, në Dumre, “N’Belik” është agroturizmi më i ri që po i shtohet hartës së zhvillimit rural. Investimi familjar i sipërmarrësit Mariglen Azizolli, u vizitua nga zëvendëskryeministrja Albana Koçiu, ministri i Bujqësisë dhe Zhvillimit Rural Andis Salla dhe deputeti Arbjan Mazniku.

I vendosur mes pyjeve me lisa dhe dushk karakteristik të zonës, “N’Belik” mbështetet në prodhimet vendase bio, duke krijuar një zinxhir të drejtpërdrejtë nga ferma në tryezë dhe duke ofruar një përvojë mikpritjeje që ndërthur natyrën, ushqimin tradicional dhe turizmin rural.

Zëvendëskryeministrja Koçiu e vlerësoi investimin si një shembull të rëndësishëm të zhvillimit të agroturizmit në vend. “Ky agroturizëm është shumë afër Tiranës dhe për standardet që ka krijuar vjen si një shembull shumë i mirë i të gjitha investimeve në agroturizëm që janë hapur kudo në vend, por me veçantinë e vet që i dedikohet pamjes dhe vendndodhjes së natyrës shumë të bukur që ka tjetër impakt”, tha Koçiu.

Ajo shtoi se mbështetja për agroturizmin mbetet prioritet dhe se përmes skemave të financimit dhe programit IPARD III krijohen mundësi konkrete për zgjerimin e këtyre investimeve në të gjithë vendin. Koçiu gjithashtu ftoi qytetarët të vizitojnë agroturizmin dhe të shijojnë natyrën dhe gatimet tradicionale të zonës.

Ministri Andis Salla theksoi se zhvillimi i zonës nuk lidhet vetëm me bukuritë natyrore, por edhe me njerëzit që jetojnë aty.

“Kjo zonë nuk përfaqësohet vetëm nga peizazhet e mrekullueshme, por mbi të gjitha nga vullneti i jashtëzakonshëm i banorëve të saj, të cilët me punë dhe vizion po e shndërrojnë atë në një motor të rëndësishëm ekonomik”, u shpreh Salla, duke shtuar se mbështetja për bujqësinë dhe agroturizmin synon të sjellë më shumë mirëqenie për familjet lokale.

Sipërmarrësi Mariglen Azizolli tregoi se agroturizmi është një nismë familjare e nisur rreth një vit më parë, e frymëzuar nga babai i tij, me synimin për t’i shtuar vlerë tokës pronë të tij dhe zonës që më parë nuk kishte shërbime turistike.

Ai tha se aktualisht “N’Belik” ofron një restorant dhe gjashtë struktura akomoduese, duke pritur vizitorë vendas dhe të huaj, ndërsa synimi është zgjerimi i mëtejshëm i aktivitetit dhe forcimi i lidhjes mes prodhimit bujqësor dhe turizmit si burim i qëndrueshëm të ardhurash për komunitetin.

Marrë nga ATSH