Ministria e Mjedisit, në bashkëpunim me Agjencinë Kombëtare të Zonave të Mbrojtura, kanë lansuar programin kombëtar “Shtigje të Pastra, Pyje të Mbrojtura”, një nismë që synon mbrojtjen e mjedisit dhe mirëmbajtjen e shtigjeve turistike në të gjithë vendin.

Ministri i Mjedisit, Sofjan Jaupaj tha sot se ky program vjen si përgjigje ndaj nevojës për angazhim më të gjerë qytetar, pasi vetëm specialistët e zonave të mbrojtura nuk mjaftojnë për të garantuar ruajtjen e këtyre hapësirave natyrore.

Jaupaj tha se “kjo fushatë bashkon ndërgjegjësimin me veprimin konkret për mbrojtjen e natyrës dhe parandalimin e zjarreve”.

Jaupaj u shpreh se “nxënësit në gjithë vendin bëhen pjesë aktive e kësaj nisme, duke kontribuar drejtpërdrejt në pastrimin dhe mirëmbajtjen e shtigjeve, përmes aktiviteteve edukative dhe ekskursioneve në natyrë, pasi kjo është një thirrje për përgjegjësi, bashkëpunim dhe dashuri për natyrën tonë”.

Programi kombëtar “Shtigje të Pastra, Pyje të Mbrojtura” synon të krijojë një kulturë të re bashkëpunimi mes institucioneve dhe qytetarëve, duke e kthyer mbrojtjen e natyrës në një prioritet të përbashkët kombëtar.

Shtigjet turistike në Shqipëri po kthehen gjithnjë e më shumë në destinacione të preferuara për vizitorët vendas dhe të huaj, falë bukurisë natyrore dhe mundësive për ecje, aventurë dhe eksplorim. Rritja e interesit për turizmin malor dhe aktivitetet në natyrë ka sjellë edhe nevojën për kujdes dhe mirëmbajtje më të madhe të këtyre hapësirave.

Burimi ATSH